حلَّ الفنان الكبير عبد العزيز مخيون ضيفاً على برنامج "كلام الناس" الذي تقدمه ياسمين عز على قناة MBC مصر، حيث كشف عن موقف جمعه بالنجمة الراحلة سعاد حسني، عبرت فيه عن عتابها له بشأن طريقة إدارته لمسيرته الفنية.

وقال مخيون: "سعاد سمعتني بتكلم مع الإنتاج، وبعدها قالتلي: إنت مش عارف تدير نفسك وموهبتك.. إزاي بتتكلم مع بتوع الإنتاج بالشكل ده؟ ولازم أجيب حد يدير شغلي، لأن إدارة الموهبة مهمة جدًا، والثقافة لوحدها مش كفاية.

وأضاف: "للأسف مسمعتش كلامها، وندمت إني معملتش كده، لأن البساطة بيتفهم غلط في الزمن ده".

وتحدث الفنان عبد العزيز مخيون، عن لقائه المؤثر بالفنان الكبير محمد عبد الوهاب، بعدما قدم شخصيته دون علمه، ضمن مسلسل "أمير الشعراء أحمد شوقي".

قال مخيون: "اندهش لما قولتله إني بقدم شخصيته من غير ما هو يعرف، ولما كلمته في التليفون، اعتذر يكمل المكالمة معايا، وبعد ما احترت شوية كلمته تاني، قالي: إنت برضو، وشرحتله الوضع، فقالي: تعالى لي بكرة الساعة 1".

تابع: "قابلته وقعدت معاه ساعة كاملة، وكنت حاسس إنه سعيد، لأنه حس إني رجعته لذكرى جميلة وهي غناؤه في حفل زفاف نجل أحمد شوقي في حياته وخلال الجلسة، صحح لي حاجات كتير عن شخصيته وسلوكه وأسلوبه".

وأشار الى أن عبد الوهاب أوصاه بالظهور بإطلالة متكاملة، وقال له: "لازم تلبس في الإيافة الكاملة وقالي إن فيه شبه بيني وبينه".